2012 Rhif 202 (Cy.33)

Gofal Cymdeithasol, Cymru

 

Y gwasanaeth Iechyd gwladol, Cymru

 

plant a phobl ifanc, Cymru

 

Rheoliadau Timau Integredig Cymorth i Deuluoedd (Cyfansoddiad Timau a Swyddogaethau Byrddau) (Cymru) 2012

NODYN ESBONIADOL

(Nid yw’r nodyn hwn yn rhan o’r Rheoliadau)

Mae’r Rheoliadau hyn yn gwneud gofynion ynglŷn â’r categorïau proffesiynol y mae’n rhaid dewis gweithwyr ohonynt i fod yn aelodau o dîm integredig cymorth i deuluoedd (ICiD). Mae’r Rheoliadau hyn hefyd yn pennu’r hyn y mae’n rhaid i fwrdd ICiD ei wneud i gyrraedd yr amcanion a roddwyd iddo gan adran 62 o Fesur Plant a Theuluoedd (Cymru) 2010 (“Mesur 2010”).

Mae adran 57 o Fesur 2010 yn gosod dyletswydd ar awdurdodau lleol i sefydlu un neu ragor o dimau ICiD. Mae’r Rheoliadau hyn yn gymwys i ardaloedd awdurdodau lleol y mae adran 57 wedi cael ei dwyn i rym mewn perthynas â hwy ac y mae ganddynt ddyletswydd i sefydlu tîm ICiD. Ar y dyddiad y caiff y Rheoliadau hyn eu dwyn i rym mae adran 57 mewn grym mewn perthynas ag ardaloedd yr awdurdodau lleol a ganlyn: Merthyr Tudful, Casnewydd, Rhondda Cynon Taf, Wrecsam, Caerdydd a Bro Morgannwg (gweler Gorchymyn Mesur Plant a Theuluoedd (Cymru) 2010 (Cychwyn) 2010 a Gorchymyn Mesur Plant a Theuluoedd (Cymru) 2010 (Cychwyn Rhif 4) 2012).

Mae rheoliad 2 yn gwneud yn ofynnol bod rhaid i dîm ICiD gynnwys craidd o bum gweithiwr proffesiynol o’r tri phroffesiwn: gwaith cymdeithasol, nyrsio a gwasanaethau ymwelwyr iechyd. Rhaid i bob un o’r proffesiynau gael ei gynrychioli yn y tîm. Ar ben hynny, rhaid i’r gweithiwr cymdeithasol, neu os oes rhagor nag un gweithiwr cymdeithasol, rhaid i o leiaf un ohonynt, fod yn weithiwr cymdeithasol ymgynghorol, fel y’i diffinnir yn rheoliad 1.

Mae rheoliad 3 yn gwneud yn ofynnol bod gan y tîm  ICiD sgiliau a phrofiad addas, o ystyried y mathau gwahanol o achosion yr atgyfeirir iddo, unrhyw ganllawiau y caiff Gweinidogion Cymru eu dyroddi a’r angen sydd ar aelodau proffesiynol o’r tîm ICiD am gymorth gweinyddol.

Mae rheoliad 4 yn nodi’r swyddogaethau y mae’n rhaid i fwrdd ICiD eu cyflawni er mwyn cyrraedd ei amcanion fel a nodir yn adran 62(1) o Fesur 2010.

Mae rheoliad 5 yn dirymu Rheoliadau Timau Integredig Cymorth i Deuluoedd (Cyfansoddiad Timau a Swyddogaethau Byrddau) (Cymru) 2010 (O.S. 2010/1690) (Cy.159).

Ystyriwyd Cod Ymarfer Gweinidogion Cymru ar wneud Asesiadau Effaith Rheoleiddiol mewn perthynas â'r Rheoliadau hyn. O ganlyniad,  mae asesiad effaith rheoleiddiol wedi ei baratoi ynglŷn â chostau a manteision tebygol cydymffurfio â'r Rheoliadau hyn. Gellir cael copi gan y Gyfarwyddiaeth Iechyd, Gwasanaethau Cymdeithasol a Phlant, Llywodraeth Cymru, Parc Cathays, Caerdydd, CF10 3NQ.

 

 

2012 Rhif  202 (Cy.33)

Gofal Cymdeithasol, Cymru

Y gwasanaeth Iechyd gwladol, Cymru

plant a phobl ifanc, Cymru

Rheoliadau Timau Integredig Cymorth i Deuluoedd (Cyfansoddiad Timau a Swyddogaethau Byrddau) (Cymru) 2012

Gwnaed                                30 Ionawr 2012

Gosodwyd gerbron Cynulliad Cenedlaethol Cymru       31 Ionawr 2012

Yn dod i rym                     28 Chwefror 2012

 

Mae Gweinidogion Cymru, drwy arfer y pwerau a roddwyd gan adrannau 60(1) a 62(2) o Fesur Plant a Theuluoedd (Cymru) 2010([1]), yn gwneud y Rheoliadau a ganlyn:

 

Enwi, cychwyn, cymhwyso a dehongli

1.—(1)(1) Enw’r Rheoliadau hyn yw Rheoliadau Timau Integredig Cymorth i Deuluoedd (Cyfansoddiad Timau a Swyddogaethau Byrddau) (Cymru) 2012 a deuant i rym ar 28 Chwefror 2012

(2) Yn y Rheoliadau hyn—

ystyr “Mesur 2010” (“the 2010 Measure”) yw Mesur Plant a Theuluoedd (Cymru) 2010;

ystyr “gweithiwr cymdeithasol” (“social worker”) yw person sydd wedi ei gofrestru fel gweithiwr cymdeithasol gyda Chyngor Gofal Cymru, y Cyngor Gofal Cymdeithasol Cyffredinol, y Cyngor Proffesiynau Iechyd neu ar gofrestr gyffelyb o weithwyr cymdeithasol a gynhelir yn yr Alban neu Ogledd Iwerddon;

ystyr “gweithiwr cymdeithasol ymgynghorol” (“consultant social worker”) yw gweithiwr cymdeithasol sydd â thair blynedd, o leiaf, o brofiad ar ôl cymhwyso ac yn meddu ar y cyfryw sgiliau, cymwysterau a chymwyseddau ag a bennir o bryd i’w gilydd gan Weinidogion Cymru mewn canllawiau a ddyroddir o dan adran 65 o Fesur 2010;

ystyr “nyrs” (“nurse”) yw person a gofrestrwyd yn rhan y nyrsys o’r gofrestr a gynhelir gan y Cyngor Nyrsio a Bydwreigiaeth;

ystyr “tîm” (“team”) yw tîm integredig cymorth i deuluoedd a sefydlwyd o dan Ran 3 o Fesur 2010;

ystyr “ymwelydd iechyd” (“health visitor”) yw person a gofrestrwyd yn rhan y nyrsys iechyd y cyhoedd cymunedol arbenigol o’r gofrestr a gynhelir gan y Cyngor Nyrsio a Bydwreigiaeth, ac sydd â’i gofnod yn y rhan honno o’r gofrestr yn cofnodi cymhwysedd mewn gwasanaethau ymwelwyr iechyd.

(3) Mae'r Rheoliadau hyn yn gymwys o ran yr ardaloedd hynny o Gymru y mae adran 57 (sefydlu timau integredig cymorth i deuluoedd) o Fesur 2010 wedi ei chychwyn mewn perthynas â hwy([2]).

Cyfansoddiad timau integredig cymorth i deuluoedd

2.—(1)(1) Rhaid i dîm gynnwys o leiaf bum person y mae pob un ohonynt yn dod o un o’r categorïau proffesiynol a ganlyn—

(a)     gweithiwr cymdeithasol;

(b)     nyrs; neu

(c)     ymwelydd iechyd.

(2) Rhaid i dîm gynnwys o leiaf un person o bob un o’r categorïau yn is-baragraffau (a) i (c) o baragraff (1).

(3) Rhaid i un aelod o’r tîm fod yn weithiwr cymdeithasol ymgynghorol.

 

3. Rhaid i dîm gynnwys staff sy’n meddu ar sgiliau a phrofiad addas, gan ystyried—

(a)     y categorïau o achosion y gellir eu hatgyfeirio at y tîm;

(b)     yr angen sydd ar y staff proffesiynol am gymorth gweinyddol; ac

(c)     unrhyw ganllawiau a ddyroddir gan Weinidogion Cymru o dan adran 65 o Fesur 2010.

Byrddau Integredig Cymorth i Deuluoedd

4. Er mwyn cyrraedd yr amcanion yn adran 62(1) o Fesur 2010 (swyddogaethau byrddau integredig cymorth i deuluoedd) rhaid i fwrdd integredig cymorth i deuluoedd—

(a)     cael ac ystyried adroddiadau rheolaidd oddi wrth y person sy’n rheoli’r tîm gan gynnwys gwybodaeth am lefelau gweithgarwch  gwasanaethu a chanlyniadau;

(b)     ceisio datrys problemau o ran cyd-drefnu gwasanaethau a ddarperir gan y tîm a gwasanaethau eraill a ddarperir gan yr awdurdod lleol a’r bwrdd iechyd lleol;

(c)     sicrhau bod gan y tîm weithdrefnau o ran—

                           (i)    amddiffyn plant;

                         (ii)    amddiffyn oedolion;

(ch) sefydlu gweithdrefn i ddatrys anghydfod rhwng yr awdurdod lleol a’r bwrdd iechyd lleol am y trefniadau ar gyfer y tîm;

(d)     sicrhau bod trefniadau digonol i oruchwylio aelodau proffesiynol y tîm fel a nodir yn rheoliad 2(1) ac i ofalu am eu datblygiad proffesiynol;

(dd) cael adroddiadau ar incwm a gwariant y tîm a hysbysu’r awdurdod lleol a’r bwrdd iechyd lleol am unrhyw broblemau ariannol neu broblemau yn ymwneud ag adnoddau eraill a fyddai’n debygol o effeithio ar allu y tîm i gyflawni ei amcanion.

Dirymu

5. Mae Rheoliadau Timau Integredig Cymorth i Deuluoedd (Cyfansoddiad Timau a Swyddogaethau Byrddau) (Cymru) 2010([3]) wedi eu dirymu.

 

 

 

 

 

 

 

Gwenda Thomas

 

Dirprwy Weinidog Plant a Gwasanaethau Cymdeithasol o dan awdurdod Gweinidog Iechyd a Gwasanaethau Cymdeithasol, un o Weinidogion Cymru

 

30 Ionawr 2012

 


([1])           2010 mccc 1.          

([2])      Ar y dyddiad y caiff y Rheoliadau hyn eu dwyn i rym mae adran 57 o Fesur 2010 mewn grym mewn perthynas ag ardaloedd yr awdurdodau lleol a ganlyn: Merthyr Tudful, Casnewydd, Rhondda Cynon Taf, Wrecsam, Caerdydd a Bro Morgannwg.

 

([3])           O.S. 2010/1690 (Cy. 159).